Resident Evil 2 Remake

سنة 2019 لحد دلوقتي بتقدم لينا ألعاب كتير حلوة، و يمكن بداية السنة كانت من اقوى البدايات في نزول لعبة مميزة و الناس منتظراها زي Resident Evil 2 Remake في اول شهر فيها !

لعبة Resident Evil 2 Remake هي إعادة صناعة لأسطورة الـPSone الي صدرت من 21 سنة في 1998 و كانت جزء من ثلاثية Resident Evil الأصلية الي عملت إسم للسلسلة بشكل خاص و صناعة ألعاب الرعب بشكل عام..

الثلاثية الأصلية لـResident Evil استمدت اجوائها المرعبة من كتابات H.P Lovecraft كاتب الرعب الشهير، و اعتمدت في تصميم مهماتها على انها تقدم بيئة مغلقة مليئة بالشرور و المخاطر المجهولة، بالإضافة لعنصر القلق الي بيبقى مسيطر على البطل بسبب قلة الموارد و كونها محدودة سواء في البيئة المحيطة او في العدد الي يقدر يشيله معاه..

لكن التصميم ده كان مناسب للألعاب في فترتها، ازاي المطورين قدرو ينقلو التصميم ده للجيل الحالي بعد اكتر من 20 سنة؟

لعبة Resident Evil 2 بتحصل احداثها في 29 سبتمبر 1998 و بتتابع قصة Leon Kennedy و هو شرطي جديد رايح يستلم شغله في مدينه Raccoon و Claire Redfield و هي طالبة جامعية رايحة مدينة Raccoon تدور على اخوها عضو فرقة S.T.A.R.S التابعة لقسم شرطة Raccoon.

اللعبة الأصلية كانت من تطوير Capcom من إنتاج Shinji Mikami و إخراج Hideki Kamiya و صدرت في 21 يناير 1998، في حين ان الـRemake كان من تطوير Capcom برضو لكن إخراجه و إنتاجه كان لمطورين أقل شهرة من النسخة الأصلية.

اللعبة كانت بتسمحلك تختار شخصية من بين Leon و Claire تلعب بيها و بعد ما تخلص لازم تلعب بالشخصية التانية عشان تشوف القصة كاملة، و ده محصلش فيه اي تغير في الـRemake و لكن القصة اتطورت من حيث اسلوب العرض و الحبكة فقط.

انما من حيث اسلوب اللعب فده كان اكبر عامل فيه تطور في اللعبة، اللعبة الأصلية اعتمدت على الـTank Controls و الكاميرات المثبتة في انها تتجنب قلة ذكاء الأعداء عن طريق انه بيصعب عليك انك تشوفهم او تهرب منهم، و لكن مع تطور الذكاء الإصطناعي اللعبة اتطورت لإنها تقدم كاميرا حدة و حركة حرة كذلك، مع زيادة ذكاء الزومبي بشكل خلاهم معضلة كبيرة صعب الهرب منها خاصة ان قتلهم بقا اصعب بالإضافة إنهم قادرين يخشو ورا الشخصية الي بتلعب بيها اي مكان.. و لكن الرعب موقفش هنا، وقت ما بتبدأ تتعود على تصميم قسم الشرطة و تقدر تتحرك فيه بسهولة اللعبة بتحطلك واحد من اهم عناصرها.. Mr.X و ده عدو مش بيتقتل و بيفضل يلاحقك طول فترة وجودك في القسم.

الـRemake الخاص بـRE2 يمكن هو افضل Remake اتعمل للعبة في التاريخ، مخلص للعبة الأصلية و لمحبي اللعبة لدرجة انه بيحسسك انك بتلعب الأصلية، و عشان كدة RE2 Remake يعتبر من افضل العاب 2019 بشكل عام و تجربة ممتعة و متملش من انك تلعبها اكتر من مرة.